«اتقابلنا على مقاعد الدراسة، ووقعت بغرامه من أوّل نظرة»… هيك وصفت ملكة جمال لبنان بيرلا حلو بداية قصّة حبّها مع زوجها، رجل الأعمال اللبناني مارسيل طالب، يلي تعرّفت عليه خلال دراستن للماجستير.

بيرلا قالت إنّو مارسيل كمان بادلها نفس الشعور، خصوصًا بعد ما جمعن التفاهم بعلاقتن ونظرتن المشتركة للحياة، والأحلام والطموحات بالمستقبل.

وكشفت بيرلا إنّ أكتر شي جذبها بمارسيل هو طموحه، مثابرته على تحقيق أحلامه، وتمسّكه بمبادئه. وأضافت إنّ أكتر شي هو بيحبّه فيها هو تفاؤلها وإيجابيّتها، وقالت: «بعرف طلّع أحلى ما فيه بأسلوبي الخاص».

بآب 2021 فاجأ مارسيل حبيبته وطلب إيدها للزواج بأجواء رومانسيّة، وشاركت بيرلا متابعيها بصور من اللحظة، وبيّن فيها قاعد ع ركبة وحدة وعم يقدّم لها خاتم الخطوبة. وبحزيران 2022، تصدّرت بيرلا وعريسها الترند على كل منصّات السوشيال ميديا بزفافن الأسطوري، يلي تألّقت فيه بفستان مبهر مرصّع بالكريستال، واستعادت فيه لقب الملكة من جديد.

وقالت بيرلا: «ما حلمت يومًا بأمير ع حصان أبيض، بس مارسيل كان هيدا الأمير اللي نطرته طويل من دون ما أحلم فيه. برأيي هيدا هو الحب الحقيقي».

وأضافت كمان: «بقدّمه بكل فخر كزوج مُحبّ وشريك حياة رائع وسند أبدي لإلي، وكمان كرجل أعمال ذكي ومبدع بتوقّع له نجاح كبير، وفخورة إنّي كون حدّه بمسيرة بتوقّع إلها كل التميّز».