عادت إشكالية عدم شرعية زواج دانا الحلاني من آلان سعد، كونه مسيحي، لواجهة الأحداث من جديد، وهاد بعد صورة جديدة انتشرت لإلن، بوقت ما ضلّ على الزفاف غير أيام معدودة..

دانا، اللي بلّشت فعلياً العدّ التنازلي للزفاف، كانت بسهرة خاصة حضرتها مع عريسها وعدد من أفراد عيلتها، ومن بينن شقيقها الوليد الحلاني، اللي التقط صورة تذكارية مع العرسان.

الصورة انتشرت بشكل واسع على السوشيال ميديا، لكن المفاجأة إنها تسببت بموجة كبيرة من الهجوم على دانا..

وظهر آلان وهو لابس عقد عليه مجسّم لصليب، كنوع من التعبير عن هويته كمسيحي ماروني..

 ويبدو إن كتار من المتابعين ما كانوا بيعرفوا هالتفصيل، فشنّوا هجوم كبير على دانا بسبب موافقتها على الزواج من شخص من ديانة مختلفة.. كما طال الهجوم والدها عاصي الحلاني..

أما الوليد الحلاني فسبق وعبّر عن موقفه من هالموضوع، وقال إنه لما بيتعرّف على بنت ما بيكون همه يعرف شو ديانتها.. 

قال كمان إنه ما بيشوف أي غلط بالزواج من فتاة من غير دينه، خصوصاً إنه عاش هالتجربة ببيته..

 فوالده متزوج من والدته كوليت بولس، اللي بقيت على ديانتها المسيحية، وبيعتبروا من أنجح العلاقات وأكثرها استقراراً بالوسط الفني..

عاصي سبق وشرح فلسفته الخاصة بالارتباط بين أصحاب الديانات المختلفة، وقال خلال احيائه لحفلة غنائية برأس السنة: سألوني كيف عاصي إذا بتحتفل بعيد الميلاد، أنت مسلم ومرتك مسيحية، وعامل أجواء ميلادية..

 قلت: سيدنا المسيح هو مخلص البشرية ولا المسيحية، أكيد البشرية..

وسيدنا محمد عليه الصلاة والسلام .. وما بعثناك إلا رحمة للعالمين، ما قال للمسلمين، فهالأديان السماوية إذا نحن بنمشي عالرسالة تبعن صدقوني ما بيكون فتنة عالأرض