كيروز طالب رئيس الجمهورية بالتدخّل

لحل المشاكل الرياضية ومنها الأولمبية

وزّع الاتحاد اللبناني للتزلج والبياتلون الكؤوس والجوائز على ابطال وبطلات موسم 2024-2025 خلال الحفل السنوي الذي أقيم في كازينو لبنان.وحضر رئيس الاتحاد فريدي كيروز واعضاء الاتحاد،رؤساء محطات التزلج،ممثلو الشركات الراعية ، عائلة التزلج من رؤساء وأعضاء اندية واداريين ومدربين ولاعبين ولاعبات

وأهالي الابطال والبطلات.

عرّيف الحفل مجاعص

النشيد الوطني افتتاحاً فكلمة عرّيف الحفل الاعلامي خالد مجاعص رحّب فيها بالحضور وجاء في كلمته"

باسم الرئيس الخلوق لأتحاد التزلج والبياتلون فريدي كيروز وباسم أعضاء الاتحاد برحب فيكن بحفل توزيع الكؤوس والجوائز على ابطال وبطلات موسم2025 وهوي الحفل السنوي التقليدي يللي بيجمع عيلة لعبة التزلج بأجواء اخوية وعائلية.

اسمحولي انو وجّه التهنئة للاتحاد اللبناني للتزلج والبياتلون يللي بكل سنة بكون عم يدخل اكتر و اكتر على طاولة القرار اللي تضع سياسة و روزنامة التزلج بالعالم.

فبعد انتخاب الرئيس الحالي للاتحاد فريدي كيروز بعام 2024 كأول شخصية رياضية بالشرق الأوسط ضمن اللجنة الأدارية للاتحاد الدولي للتزلج ،سجل العام 2025 انجازين كبار جداد على صعيد العمل الاداري الدولي مع دخول لبنان كعضو فاعل بكل من اتحاد البياتلون الدولي و الاتحاد الدولي لتسلق الجبال.

كل هالانجازات لم تكن ممكنة لولا انو اتحاد اللبناني للتزلج هو فعلاً علامة فارقة بلبنان عن العديد من الاتحادات الغير متجانسة و طبعا الغير فعالة و يلي رياضيينها بيدفعوا للاسف ثمن التخبط داخل اتحاداتها .

فالكل مدرك انو اتحاد التزلج بلبنان بيبقى من الاتحادات الفاعلة والنشيطة وعم بتقوم بواجباتها " من دون أي تمييز" على أكمل وجه من رعاية وتطوير اللعبة وصقل الجيل الناشئ وتنظيم البطولات والمشاركة بالدورات والمسابقات والبطولات الخارجية ببعثات من كافة الالعاب و الفئات العمرية .

سر نجاح هالاتحاد سهل جداً و هو عمل اللجنة الادارية بيد وحدة والاهم انها من دون تفرقة أو تمييز لأنديتها و ابطالها بهدف رعاية رياضة التزلج وهيي اللعبة الشتوية الوحيدة ضمن الاتحادات الأولمبية ال28 الموجودة حالياً بلبنان.

و قد ضمن لبنان 3 بطاقات ل 3 رياضيين بشهر شباط ال2026 بالعاب الاولمبياد الشتوي يللي رح تصير بكورتينا(ايطاليا) لـ 3 لاعبين هني لاعبين برياضة التزلج الالبي و لاعب برياضة تزلج العمق.

و روزنامة ال2026 ستكون قياسية بالنشاطات و ستحمل سباقاتها نقاط التصنيف للتأهل الى بطولة العالم يلي رح تستضيفها سويسرا بشتاء ال2027 .

بالنهاية رح كون صريح لنقول انو لم اسمع ابداً عن خلاف داخلي ضمن اللجنة الادارية والاتحاد الذي أبعد كلياً السياسة عنّو وما دخل بالزواريب المناطقية الضيّقة و لهالسبب هو صامد و بيبقى دايماً كتلة موّحدة.

برحّب فيكن مجدداً".

وعُرض فيلم يلخّص نشاطات الاتحاد محلياً وخارجياً على الصعيدين الفني والاداري.

                     الرئيس فريدي كيروز

ثم ألقى رئيس الاتحاد اللبناني للتزلج والبياتلون فريدي كيروز كلمة ارتجالية جاء فيها"رح بلش كلمتي بشكر لمعالي وزيرة الشباب والرياضة الدكتورة نورا بايراقداريان يلي عم بتثبّت كل يوم انو بوجودها على راس هرم الوزارة صار كل رياضي ، كل نادي وكل إتحاد بيقدر يقول انه صار عندو مرجعية بيقدر يلتجي لها وصار فينا نعتبر انو حقوق الرياضيين محفوظة وإنو الرياضة اللبنانية بالإتجاه الصحيح من خلال الرؤية والخطة الإستراتجية يلي وضعتها الوزارة من كم اسبوع. من بعد العرض يلي شفناه عن نشاطات الإتحاد ، بدي خبر ليلّلي ما بيعرفوا إنو إلاتحاد اللبناني للتزلج والبياتلون هو الإتحاد الوحيد بلبنان يلي بمثل لبنان بالألعاب الأولمبية الشتوية، والإتحاد الوحيد يلي بحقلوا ينظم البطولات بلبنان، وعندو 5 ألعاب أولمبية عم بطورها وينشرها بالمناطق الجبلية وهي ( التزلج الألبي ، كروس كاونتري، سنوبورد ومؤخراً البياتلون ومونتنييرينغ يلي تم قبولوا من قبل الإتحاد الدولي من شهرين خلال الجمعية العمومية يلي عقدت بالمكسيك ويللي انا شاركت فيا.

هيدا الشي عم يطلب منا كهيئة إدارية ولجان فنية متطوعة مجهود كتير كبير تجاه أنديتنا وتجاه لاعبينا من خلال العمل على تنظيم بطولات بمواصفات دولية ،تأمين المخيمات التدريبية للاعبين والمدربين ، كما تأمين المساعدات اللوجستية حتى نكون بمصاف الدول المتطورة برياضة التزلج

وكل هيدا الشي بموازنة محدودة وإتكال ذاتي.

اليوم كل الموجودين معنا بيعرفوا المشاكل الموجودة بلبنان ويلي هي نوعين :

-مشاكل طبيعية ما عنا حلول لها وهي التغيّر المناخي يلي عم بتقصّر زمنياً موسم التزلج وهل الشي عم بخلينا نطرح حلول صعبة على اللاعبين وعلى محطات التزلج ولكن مضطرين نأخد هيدي الإجراءات.

-المشاكل يلي المجتمع الرياضي مسؤول عنا وهي : وجود لجنتين أولمبيتين , عدم إهتمام الرعاة برياضة التزلج بشكل مؤثر ، موازنة الوزارة شبه معدومة ، اندية عم بتعاني من نزيف هجرة لاعبيها.

ومن هون رح وجّه نداء الى فخامة رئيس الجمهورية العماد جوزيف عون للتدخل السريع لأنو الثمن عم يدفعوا اللاعبين.

بس بإتحاد التزلج ، بالعمل الجماعي ، بمساعدة الإتحادات الدولية يلي مننتمي لها ، بمساعدة محطات التزلج ، الأندية وأهالي اللاعبين عم نجرب نتخطى جميع هيدي المشاكل لنقدر نوصل الصورة الحلوة عن بلدنا ونرفع العلم اللبناني بالمحافل الدولية ونحقق الإنجازات في البطولات وإظهار الصورة المشرفة لبلدنا.

ومن أهم إنجازات لاعبينا خلال هيدي السنة ويلي ما منقدر نكون بحفل تكريم اللاعبين إلا ما نذكرها:

حتى تاريخ اليوم عنا 3 لاعبين ( مانو عويس ، اندريا حايك وسامر طوق ) قدرو يجمعوا النقاط الأولمبية يلي بتخولهم يشاركوا بالألعاب الاولمبية الشتوية يلي بدها تتنظم بكورتينا-ايطاليا خلال شهر شباط 2026

وفي لاعبين بعدن عم بنافسوا ويشاركوا بسباقات دولية ليتصنفوا لهيدي البطولة

وهنّي جوان حبيش وسارة زيدان وغيرن .

ويلي بقدر قولوا انه هيدا المجهود هو مجهود شخصي للاعبين وبدعم من اهالين فقط بظل غياب اللجنة المعنية بالألعاب الاولمبية.

لهيدي الأسباب بدي أعلن إنو إتحاد التزلج قرر مساعدة كل لاعب بشارك بالألعاب الأولمبية الشتوية وقرر يكمل مسيرتو الرياضية بالسباقات لموسم 2026 ورح يطلعلوا بمبلغ 3000 دولار اميركي.

كمان ما فينا ما نذكر اللاعبين يلي هيدي السنة قدروا حققوا الميداليات بالبطولات القارية وهني :

- اندريا حايك (مركز ثالث ببطولة الدول الصغرى بالتزلج الالبي بالبوسنة)

- سارة زيدان (مركز ثالث بالتعرج الفصير القصير باليونان)

- جاندارك طوق ميداليتين فضيتين بسباقات البياتلون في بطولة البلقان في صربيا.

- بول كيروز ميداليتين فضيتين ايضا في بطولة البلقان في البياتلون

عم أذكر هيدي الاسماء حتى نقول إنه بالرغم من كل المشاكل لاعبينا عم بتحقق للبنان الإنجازات بس يكون في إرادة وعمل جماعي.

النقطة الثالثة يلي بدي ضوي عليا:عائلة الإتحاد مؤلفة من 28 نادي مرخص من وزارة الشباب والرياضة إضافة الى نادي الجيش اللبناني .

خلال موسم 2025 شارك بالبطولات الرسمية 27 نادي وفي 21 نادي حققوا ميداليات بمختلف الألعاب ولاعبينن موجودين معنا الليلة.

هيدا الشي بفرجي انه 78% من انديتنا بمختلف المناطق اللبنانية عم بتشتغل بصورة صحيحة وعم تحقق الهدف المطلوب منا يلي هو اساس دستورنا و "نشر وتطوير الرياضات الشتوية".

ويمكن هيدا الشي ما منشوفوا إلا بإتحادات قليلة بلبنان وهيدا دورنا بالإتحاد انو نحافظ على الأندية الفعلية وما يكون في أندية وهمية.

من هون بدي وجه تحية لكل الأندية وقلكن انو عملكم الدؤوب بمعزل عن كل المشاكل هو دليل ساطع للجميع بأن الرياضة الشتوية والألعاب يلي مؤتمنين عليها رح تتخطى جميع المصاعب وتنطلق لمرحلة أفضل.

إن الإتحاد اللبناني للتزلج ومن خلال هيئته الإدارية الحالية وبمساعدة اصحاب محطات التزلج عمل مجهود كبير لرفع مستوى رياضة التزلج في لبنان ونشرها من خلال إقامة الدورات التدريبية للمدربيين و إقامة العديد من السباقات والوقوف الى جانب الاعبين قدر المستطاع.

وأخيراً تعلمون ان التحضير لهذا الموسم يتطلب الكثير من الجهد من قبل الجميع لذلك نطلب من جميع الأندية أن تتعاون مع جميع القرارات التي يتخذها الإتحاد بإحتراف وأن تكونوا على قدر المسؤولية وذلك لكي تتمكنوا من المنافسة وحصد الميداليات.

اما انتم يا ابطال لبنان في التزلج على الثلج سيدات ورجال وناشئين وصغار فالشكر لكم على مجهودكم لتحسين مستوى المنافسة كما الشكر أيضا" لأهاليكم الذين شجعوكم لممارسة رياضة التزلج والشكر لأنديتكم التي إحتضنتكم وأمنت بقدراتكم

وأخيرا" إننا نقول لكم بأن الإتحاد اللبناني للتزلج والبياتلون سيبقى الى جانبكم لتحقيق الميداليات وأفضل النتائج.

وبالختام،بدي شير أنو الصديق عصام مبارك صاحب "ميزون دو سكي" قدّم الكؤوس والجوائز المالية والعينية الى الابطال والبطلات".

ثم سُلّمت الدروع التذكارية والتقديرية الى رؤساء محطات التزلج،مدرسة التزلج في الجيش اللبناني، "ميزون دو سكي"(قدّم جوائز عينية ومالية الى الفائزين والفائزات) ،كرمرشل انشورنس"،الصليب الاحمر، شركة "ميديا" لتبدأ عملية توزيع الجوائز على ابطال وبطلات موسم 2024-2025.

___________. متابعة === عايدة حسيني