شيرين عبد الوهاب مكنتش محتاجة في حفلها بالساحل تثبت إنها بتعرف تغني لأن تاريخها وأغانيها حسموا النقطة دي من زمان لكن بعد غياب طويل عن الحفلات كان قدامها اختبار أهم هل الجمهور لسه مستنيها؟

الإجابة ظهرت من قبل ما شيرين تطلع المسرح مع الإقبال الكبير على الحفل وتوافد الآلاف وبعد ظهورها اتحول الجمهور من مجرد متفرجين لطرف أساسي في ليلة العودة.

الهتافات والغزل فيها بين الأغاني وترديد الجمهور لكلمة قمر كلها مشاهد كشفت إن العلاقة بين شيرين وجمهورها موقفتش خلال فترة غيابها والأهم إن شيرين نفسها ظهرت مبتسمة ومتفاعلة وعفوية وهي الصورة اللي الجمهور ارتبط بيها من بداية مشوارها.

الليلة كمان كان فيها دعم واضح من الوسط الفني مع حضور غادة عبد الرازق وإلهام شاهين وتقديم بسمة وهبة لشيرين على المسرح بجانب ظهور محمود الليثي وغنائه معاها فتحول الحفل في أجزاء منه لاحتفال بعودتها مش مجرد حفلة صيفية.

كل ده ميعنيش إن حفل واحد كفاية للحكم على عودة كاملة لأن الخطوة الجاية محتاجة استمرار وحفلات وأغاني جديدة لكنه أثبت أهم حاجة كانت شيرين محتاجة تعرفها بعد الغياب.. جمهورها لسه موجود.

شيرين رجعت من نفس الباب اللي صنعت منه نجوميتها من البداية.. صوتها وأغانيها وجمهور حافظها ومستنيها وكأنها مغابتش.