مالها شيرين يا جماعة ؟! إيه المشكلة اللي كانت في الحفلة يعني ؟! إيه المشكلة اللي كانت في لبسها ؟! إيه المشكلة اللي كانت في صوتها؟!

هو بجد الناس اللي بتكتب عن عيوب عايزين يوصلوا لإيه؟ عايزين شيرين تبقى أحسن فعلا ولا عايزين يقضوا عليها تماما؟

اللي نفهمه إن مطربة كبيرة زي شيرين في مرحلة التعافي الصحي، المفروض تلاقي دعم وحب وتشجيع في أول حفلة بعد غياب شهور طويلة، مش إحباط وتكسير مجاديف.

مش ممكن تكون الناس بتسخر من لبسها، رغم إنه مناسب ليها في الوقت الحالي، زي ما كانت بتلبس حاجات مختلفة في أوقات تانية مناسبة لوقتها.. فمش فاهم إزاي الناس عايزينها تلبس على مزاجهم حتى لو مش مناسب إليها.

الناس موقفتش عند لبسها، لكن اتكلمت كمان عن صوتها وإنها مش بكامل لياقتها، بنوا افتراضهم دا علشان فيه كام أغنية كانوا بلاي باك، رغم إنها في نفس الحفلة غنت لايف، لكن اللي عايز يسيء إليها هيعمل كدا حتى لو هي في كامل لياقتها.

النقطة التالتة اللي الناس روحت ليها بشكل غريب، إن الجمهور مكانش مبسوط وسلب الحفلة ومشي، رغم إن فيه كمية فيديوهات لحجم الجمهور الكبير في الحفل، وفيه فيديوهات لتفاعل الجمهور الكبير مع أغانيها، كتير جدا، يعني حاجة مردود عليها بفيديوهات مش بالكلام.

طيب حتى لو كل الكلام اللي فوق دا كان صح، هل المفروض إننا ندوس على شيرين بيه ولا المفروض إننا نكون منصفسن ونقول الحاجات الحلوة كمان علشان شيرين العائدة بعد غياب متحبطش وتقدر تكمل.. دا لو فعلا كانت نية اللي بينتقد إنها تكون أحسن.

الغريب إن محدش أشاد مثلا إن شيرين قدرت تسيطر على نفسها ومتقولش على المسرح أي كلام يعرضها للانتقاد.

#بدون_وصاية

#شيرين_عبدالوهاب