ملاحظين اليومين اللي فاتوا، إن فيه حالة غضب على السوشيال ميديا من أنغام، بسبب إنها عملت حفلة (خاصة) في الساحل، بالتزامن مع حفلات جماهيرية لشيرين عبد الوهاب وعمرو دياب.

حفلة أنغام كانت بدعوات خاصة ومش متاجة للجمهور العادي، ومكانش ليها دعاية كبيرة ولا أخبار كتير منتشرة عنها، حتى على صفحة أنغام نفسها مكانش فيه إشارة ليها، لدرجة إن بعض جمهور أنغام كان بيدخل في التعليقات يشكك إن فيه حفلة من الأساس .. فهل أخطأت أنغام بالموافقة على إحياء حفل بدعوات خاصة في يوم شيرين وعمرو دياب بيقدموا حفلات بحضور جماهيري ضخم ؟!

هل كان على أنغام أن تروج لحفلها بطريقة مبتكرة تجعلها حاضرة ومنافسة على صدارة التريند بدلا من ترك الفضاء الإلكتروني بالكامل لشيرين وعمرو دياب وتضع جمهورها في موقف محرج لعدم امتلاكه أدوات نمكنه من المنافسة في هذه الليلة ؟!

تقريبا حفلة أنغام مطلعش عنها أي أخبار يوم إقامتها الجمعة اللي فاتت، وكأنها متعملتش أصلا، امبارح بس بدأنا نشوف صور وفيديوهات منها، واللي بتوضح إن أنغام كانت في قمة التألق، على مستوى الشكل والأداء، ارتدت فستان أسود أشاد به الكثيرين على مواقع التواصل، وبالنسبة للأداء فلا خلاف على تمكن أنغام من أدواتها.

لكن المسألة هنا مرتبطة بالجمهور، لماذا وضعت أنغام جمهورها في مأزق ولم تمنحه فرصة الاحتفال بنجمته المفضلة في يوم كانت المنافسة فيه على أشدها ؟ شيرين العائدة للساحة بعد غياب مدفوعة بحالة من التعاطف جعلتها في صدارة التريند، وعمرو دياب في أول ظهور على المسرح بعد ألبومه الأخير، لكن أنغام التي تغني تحت عنوان اللقب المثير للجدل "صوت مصر"، غابت عن المنافسة، ولم تكن هذه هي المشكلة الوحيدة، لأنها لديها ما يبررها، لكن بقت الأزمة في أن جمهورها أجبر على الخروج من المنافسة دون أن يدخل التحدي، فلم يتاح له من حفل أنغام الخاص ما أتيح لمحبي شيرين وعمرو دياب في حفلاتهم الجماهيرية، من لقطات عفوية، وتواصل وتفاعل مع الجمهور.. الجمهور دائما هو من يصنع الحدث.

باختصار أنغام دخلت منافسة غير متكافئة في ليلة الجمعة الماضية، لأنها دخلت بدون جمهورها.. كفريق كرة قدم يلعب بدون جمهور أمام فريق يملأ جمهوره كامل أرجاء الملعب، وربما دا بيفسر حالة من اللوم لأنغام من محبين ليها على مواقع التواصل، بيلوموها على إنها وافقت على الحفل، وبيقولولها إنه مش مناسب لتاريخها ومشوارها، وشايفين إن الفلوس في حالة زي دي مينفعش تبقى أولوية على اسم الفنان.

بيتكتب كدا رغم إن حفل أنغام مكانش متواضع ولا حاجة بالعكس، كان واضح إن مستوى التجهيزات فيه عالية جدا، ويليق بأنغام على مستوى الشكل، لكن زي ما قلت المشكلة كانت في عدم وجود الجمهور في ليلة حاسمة ك ليلة الجمعة الماضية.. المشكلة في إن جمهور أنغام تم تحييده في ليلة كانت شيرين وعمرو دياب في حماية جمهورهم، ومتسلحين بيه.

بالمناسبة لو كانت أنغام عملت نفس الحفلة في يوم تاني مفيهوش منافسة مكانتش اتعرضت لأي انتقاد، ولا كانت الناس هتستغرب إن الحفلة مش واخدة حقها في الدعاية، لأن كل المطربين بيعملوا حفلات خاصة الحضور فيها بالدعوات، ومحمد حماقي في نفس اليوم كان عنده حفلة بدعوات فقط، لكن متعرضش لنفس الهجوم اللي اتعرضت ليه أنغام.

المستغرب إن صفحة أنغام على السوشيال ميديا مكانتش مهتمة بالدعاية للحفلة دي، وكأنها مش على جدولها، أو أنها بتعتبرها حفلة مش محسوبة.

في النهاية عايزين نقول إن أنغام مطربة كبيرة، وجمهورها كبير، ولازم في اختياراتها المستقبلية تراعي فكرة إن المنافسة تكون متكافئة، ومتدخلش تحدي بعد كدا بدون ما يكون معاها جمهورها.